1Ti 6 | KYG | STEP | Kalavusi ali'ya ne'aliya vaya'mogi ali'ya'mo aepa veka'apimo aiyafi'mo mai'ne'a ge'amo afige'apao Goti agi'ale'e alita apaya ne'malona gele'efe'mo hu'a faipa hu'a o'ateyo.

1 Timothy 6

Ali'yate'mo mai'naya vaya'aife'mo hu'niya gemae

1 Kalavusi ali'ya ne'aliya vaya'mogi ali'ya'mo aepa veka'apimo aiyafi'mo mai'ne'a ge'amo afige'apao Goti agi'ale'e alita apaya ne'malona gele'efe'mo hu'a faipa hu'a o'ateyo. 2 Ali'ya aepa veka'apimo'a agesa afino fatago hu'nisiya vekamo mai'nisiyana ali'ya'amo ne'aliya vaya'mogimo, konagatimo'mo mai'niya'mofe'mo ge'amo o'afigune, hu'a osu'a, lagaemo ha maesuna vekamo agesa afino fatago hu'niya vekamo lahau'niya vekamo mai'niya'mofe'mo ge'amo afigune, hu'a hisaya kava'mo hane'niye. Ani kava'mo hiyo, huka hapa paiteka alika apaya malo.

Kagemi yafe'mo ava gemo hu'niya gemae

3 Ala kava netimo Yesu Kalaisi ge'amo alagepa gemo hane'niya'mofe'mo kaita haugekana huno ohane'neno vaya'mo alino alagepa huno ne'apateya gemo hane'niye. Mago vekamo'a ani gelefe'mo, he, huno osuge Gotife'mo mono nehaya kava'mo alino afole aino ne'ateya gemo o'afige huteno'ae'mo alu gemo alino apaya ne'malesiya'mo'mo 4 ala vekamo mai'nove, huno agesamo ne'afiya vekamo mai'neno magoke yafe'mo agesamo no'afiye. Agaemo geleti'mo kaveta hisiyafeke'mo hau'nigeno hosu apaipa kafa hapaege kaveta huge hu'a faipa hu'a apatege hosu apaipa kali'a apatege nehaya kava'mo afole ne'aiye. 5 Apaipa apakesamo'mo kasali'niya yakana hu'a apakesamo afite'a lama gemo o'ali'ne'a hulu vaige vaige hute'a alu ge alu gemo hute'apae'mo afa gemo nehae. Mono kavatiletike'mo akamelegati'mo mago'e ya'mo aligune, hu'a apakesamo ne'afiye. Ani agufa vaya'mo maika halove huka apateteka maiyo. 6 Apakesamo ne'afiya'monanafa mono kava'mo hute'a mago'e hu'a kagemi ya'mo alisayafe'mo hapa'ye osu'nigeno apaipamo'mo falu nehisiya vaya'mogi akamelegati'mo mago'e hu'a alopa ya'mo aligae. 7 Itatimogi ali'a nelataya afina'mo mago ya'mo ali'neta afole no'aune. Ani kava huta ago afi'nonana falisuna afina'mo mago kagemi yati'e'mo alinita afa'a o'ugune. 8 Ne'yati'e kukenati'e'mo hane'nisiyana laipamo'mo falu hugiye. 9 Kagemi ya'api'e vaya'mo maisayafe'mo hapau'nisiya vaya'mo apamalageka hisiya kate'mo ne'vageno'ae'mo hosu hapa'ye kava'apimo'a ane'aifi'mo hegekana huno ne'apatafaige'apae'mo alagi asagau'a ne'aiyanage'a ata kopi'mo lami'a maigae. 10 Monie'mo hapa'ye nehiya kava'mo'a muki alu hosu alu hosu kava'mo aepa'amo hane'niye. Mago vaya'mo mago'e monimo alisayafe'mo hapa'ye hu'nige'apae'mo lagesa afita fatago nehuna gemo atale'nageno asole hanageke kava'mo'a apaipafi'mo hapae'nige'a asole kana ya'mo ali'nae.

11 Apakafu nekiya'monanafa kagaemo Goti veka'amogae, hu'na, ani kavategati'mo ataleka kaune hetaleka fatago kavanagi mono kavanagi kahau kayamopafi'mo kahau'niya kavanagi atafauka alagi hisana kavanagi yagu yaga kaipa kali kavanagi huka atafauka alagi hisanafe'mo vegala ao. 12 Kagaemo alagepa kamemo apakesa afi'a fatago nehaya vaya'mogi nehaya agufa kamemo huvo. Maige maige huka maisanafe'mo keya aeno ge hu'niyanagi ani kavate'mo atafauka alagi huka maiyo. Keya aeno ge hu'nigekae'mo kagaemo muki afi'naya vaya'ai apaulagale'mo, Yesufe'mo nagesa afi'na fatago hu'nove, huka alagepa gemo ago hapa pai'nane. 13 Nagaemo Goti'a afa'a ne'maiya ya'mo alino ne'apamiya vekamo aulagale'e Kalaisi Yesu'a Ponitiyasi Pailati aulagale'mo alagepa gemo huteno fali'niya vekamo aulagale'e'mo mai'ne'nae'mo kaha nepauve. 14 Nagaemo, huvo, hu'na kaha pai'nova gemo afiteka magoke vai'mo afa'a o'alisanafe'mo alagi akame hume hume ne'ugeno'ao Ala kava netimo Yesu Kalaisi'a afole aino. 15 Goti'a lekana pai male'niya afina'mo afole aisigeno'ae'mo Yesu'mo afole aigiye. Agaefeke'mo hao ke nehona vekamo mai'neno magoke himamu'a'e vekamo mai'neno yagai'a ne'apataya vaya'aite'mo yagaino ne'apateya vekamo mai'neno kava vaya'ai kava ne'apimo mai'niye. 16 Agai'amo ofalino mai'neno afa'a ne'maiya ya'mo aepa vekamo mai'neno ha le yategamo mai'niyanage'a vaya'mo alagi o'visaya agufa ha le yategamo mai'niye. Muki vaya'mogi o'age'nayanage'a afa'a o'agegae. Ala agi'amo amisageno himamu'aleti'mo muki afina'mo yagaige yagaige huno yagaino maino. He, lama ge.

Kagemi ya'apimo hane'niya vaya'aife'mo hapa paisiya gemo ha pai'niya gemae

17 Ma mopafi kagemi ya'apimo hane'niya vaya'aife'mo, lapakufamo avalelita ohaitapa hano hisiya monimo'a laha maegaiye, hutapa lapakesamo o'afitapa muki ya'amo lamogaga aisunafe'mo nelamiya vekamo afa'a mai'niya Gotifeke'mo laha maegaiye, hutapa lapakesamo afiyo, huka hapa paiyo. 18 Kagemi ya'api'e vaya'mo asole alagepa kava'mo kagemi ya'apigana hu'a malesayafe'mo alagepa kava'mo nehu'apae'mo fiku apamige kagemi ya'apimo ali'a fako hu'a apamisayafe'mo hapauge hu'a maiyo. 19 Ani kava'mo nehisayana alagepa ya'apimo henaga'amo hapa maesiya afinafe'mo ne'malayanage'a maige maige hu'a maisaya ya'apimo aligae.

20 Timotiyo, hu'na, Goti'a yagaika atesanafe'mo alagepa faigoko ge'amo alino kami'niya ge'ale'mo alagepa huka yagaika ato. Mago vaya'mogimo Gotife'mo mono osu'a afa geleti'mo Goti ge'ale'mo hu'a ae'a ati nekae. Mani gee'mo agete'a afi'naya gemae, hu'a nehaya'monanafa aigofe ge'apimo hane'niye. 21 Apakaemo, mani gemo akame nehune, hu'a nehaya geleti'mo lagesa afita fatago nehuna gemo atale u'e'a hu'a mai'nae. Ani kavatefe'mo maika halove huka maiyo. Goti'a fiku lapa maeno lapamino. He, lama ge.